Ermənistan Avrasiya İttifaqına girməsəydi, vəziyyəti daha yaxşı olardı.

Axar.az xəbər verir ki, bunu Ermənistanın keçmiş baş naziri Qrant Baqratyan Konrad Adenauer Fondunun İrəvanda keçirdiyi müzakirələrdə çıxışı zamanı söyləyib.

“Biz Avrasiya İttifaqına üzv ölkələrlə 2011-ci ildən bir ticarət məkanındayıq. O vaxtdan indiyə qədər ticarətdə heç nə dəyişməyib. Əgər Avrasiya İttifaqı Avropa kimi hər kəslə azad ticarət zonası yaratsaydı, o zaman neytrallığımızı qorumaq mümkün idi. Amma indi neytrallığı qorumaq mümkün deyil. Avrasiya İttifaqı Rusiyanın nəzarəti altındadır. Belə şəraitdə Ermənistan ya gərək onun maraqları ilə hesablaşsın, ya da onunla vidalaşsın. Məncə, biz bu ittifaqdan çıxmalıyıq. Təhdidlər üzərində ittifaq qurmaq olmaz. Bizim bu təşkilatdakı 2 illik üzvlüyümüz İrəvana 800 milyon dollara başa gəlib. Biz Avrasiya İttifaqının üzvü olmaqla səhv addım atdıq. İrəvan Avrasiya İttifaqında 200 milyon dollar qazandı, amma Avropada 21 milyard dollar itirdi”, – deyə o bildirib.

O, həmçinin hökumətin maaşları iki dəfə artıracağını dediyini, amma ölkənin çöküş dövrü yaşadığı zamanda bunu necə edəcəyini söyləmədiyini bildirib:

“Kreditlər almaq ölkəni yalnız çöküşə çəkir. Ölkədə xalq üçün investisiya fondu yoxdur. İqtisadi artım üçün hər kəs çalışmalıdır. Bizim ölkədə iqtisadi artım olmayanda belə iqtisadiyyat oliqarxları cəzalandırıb, maliyyə itkisinə məruz qoymur. Biz hələ indiyə qədər iqtisadi artım olmaması ucbatından heç olmasa bir erməni oliqarxının bankrot olmasını görməmişik. Elita dəyişdirilməlidir”.