Bu gün səhər saatlarında havaya qalxan İstanbul-Bodrum təyyarəsində həyəcanlı anlar yaşanıb.

Musavat.com xəbər verir ki, təyyarə havaya qalxandan bir neçə dəqiqə sonra özbək əsilli qadın sərnişin ərinin telefonuna gələn mesajı görən zaman əsəblərinə hakim ola bilməyib.

Qadın 7 və 10 yaşlı uşaqlarının gözü önündə əvvəlcə ərinə bağırmağa, daha sonra isə onu döyməyə başlayıb. Təyyarə heyətinin müdaxiləsinə baxmayaraq, qadın ərini döyməyə davam edib, bunu görən kişi boş olan yerlərin birində əyləşməyə məcbur olub. Sakitləşməsi üçün ayaqyoluna götürülən qadın yerinə döndüyü anda yenidən ərinə bağırmağa başlayıb.

Qadın ingilis dilində “məni aldatdı, ona gününü göstərəcəyəm” deyib bağırmağa davam edincə, digər sərnişinlər ona qarşı sərt təpki göstərib. Nəticədə təyyarə heyətinin üzvləri qadının qoluna plastik qandal vuraraq arxa oturacaqlarda əyləşdiriblər. Hadisə zamanı həyəcandan bir sərnişinin halı pisləşib.