"Sabah" mübarizə aparmaq üçün çətin komandadır.

Axar.az xəbər verir ki, bunu İngiltərənin "Mançester Yunayted" klubunun baş məşqçisi Maykl Karrik UEFA Çempionlar Liqasının Liqa mərhələsinin "Sabah"la I tur qarşılaşmasından sonra mətbuat konfransında deyib.

"Bu, bir qədər şablon səslənə bilər. Əlbəttə, bizim üçün əsas məqsədlərdən biri oyunu qazanmaq idi. Qarşılaşmada çoxlu müsbət məqamlar oldu. Xüsusilə hücumdakı bəzi kombinasiyalarımız və hərəkətlərimiz çox yaxşı alındı. Oynadığımız futbolun bir sıra epizodları həqiqətən də yüksək səviyyədə idi. Keçidlər zamanı rəqib üçün ciddi təhlükə yaradırdıq və ümumilikdə qarşılaşmanın böyük hissəsində müdafiədə də yaxşı çıxış etdik.

Rəqibə də böyük hörmət göstərmək lazımdır. "Sabah" mübarizə aparmaq üçün çətin komandadır. Onlar qısa ötürmələrlə bir-birləri ilə yaxşı əlaqə quraraq oynayırlar və topu geri qazanmaq üçün rəqibi daim yüksək tempdə işləməyə məcbur edirlər. Əslində, hesab baxımından oyunun rahat keçdiyi təəssüratı yarana bilər. Lakin qarşılaşma heç də bütünlüklə rahat alınmadı. Buna baxmayaraq, düşünürəm ki, bu axşam çox yaxşı mübarizə apardıq və nəticədə layiqli qələbə qazandıq", - o söyləyib.

Qeyd edək ki, "Mançester Yunayted" - "Sabah" matçı "qırmızı şeytanlar"ın 4-0 hesablı qələbəsi ilə bitib.