Rusiya və Ukrayna şirkətlərinin Suriyada Əsəd idarəsində olan Tartus, Lazkiyə və Banyas limanlarına göndərdiyi daşımaların 70 reysini Türkiyəyə məxsus 21 firma həyata keçirib.

Axar.az xəbər verir ki, bu barədə məlumatı ABŞ-da yerləşən C4ADS təşkilatı yayıb.

Yayılan hesabata görə, 2012-ci ilin yanvarı və 2013-cü ilin iyun ayları arasında Türkiyə dənizçilik şirkətinə aid gəmilər Ukraynanın Qara dənizə tökülən Buh çayı üzərindəki Oktyabrsk və Nikolayev limanlarından aldıqları yükləri Suriyada rejimin idarəsi altında olan Tartus, Lazkiyə və Banyas limanlarına aparıb. Türkiyə gəmilərinin bu müddətdə 70 səfər etdiyi bildirilir. Daşımaları Türkiyəyə məxsus 21 firma həyata keçirib.

Hesabatda Oktyabrsk və Nikolayev limanlarından daimi olaraq silah daşındığı bildirilsə də, Türkiyə şirkətlərinin silahların daşınmasını həyata keçirib-keçirmədiyi bilinmir. Çünki limanlarda silah daşınmasından əlavə həm də mal təhcizatı aparılır. Hesabatda səfərləri edən gəmilərin və şirkətlərin adları da çəkilir.