ABŞ Mərkəzi Kəşfiyyat İdarəsinin keçmiş əməkdaşı Edvard Snouden yeni açıqlama ilə çıxış edib.

Axar.az xəbər verir ki, Edvard Snouden NBC kanalına müsahibəsində heç vaxt Rusiyaya casusluq etmədiyini deyib:

"Mən heç vaxt Rusiya hökumətinə çalışmamışam. Onlar mənə heç vaxt dəstək verməyiblər və mən Putinlə bir dəfə də olsun görüşməmişəm. Bu günə qədər Rusiyadan hər hansı bir maddi yardım da almamışam".

Rusiyada müvəqqəti sığınacaq müddəti avqustun 1-də bitəcək olan Edvard Snouden "dünyanın hər hansı bir yerinə getmək imkanım olsaydı, həmin yer mütləq evim olardı", - deyib.

Xatırladaq ki, 2013-cü ilin iyununda Edvard Snouden "Vaşinqton Post" və "Qardian" qəzetlərinə Amerika Təhlükəsizlik Agentliyinin 200 min məxfi sənədini gizli yolla göndərərək ABŞ və Britaniya xüsusi xidmət orqanlarının dünyadakı gizli fəaliyyətini ifşa etmişdi.