Avstriya ATƏT çərçivəsində öz səylərini aktivləşdirməyə və Ukraynanın şərqində vəziyyətin monitorinqi üçün öz pilotsuzlarını verməyə hazırdır.

Axar.az rus mediasına istinadən xəbər verir ki, bu barədə Avstriya XİN başçısı Sebastyan Kurts Kiyevdə Ukrayna prezidenti Pyotr Poroşenko ilə görüş zamanı bildirib.

"Bizim missiyamız – təkcə ATƏT çərçivəsində Avstriya müşahidəçilərini göndərmək yolu ilə sülhün nizamlanmasını dəstəkləməkdən deyil, həm də ATƏT-in missiyası üçün on Avstriya pilotsuzunu göndərməkdən ibarətdir".

Xarici işlər nazirinin sözlərinə görə, Avstriya Ukraynanın şimalında ağır yaralanmış dinc əhali üçün tibb və dava-dərman sahəsində də öz yardımını gücləndirir. "Biz bir neçə nəfəri müalicə üçün Avstriyaya götürə bildiyimiz üçün çox şadıq", - deyə nazir bildirib.

Poroşenko da öz növbəsində, yaxın günlərdə ATƏT-in monitorinq üçün göndərilən müşahidəçilərinin sayının artacağına, bu işə avstriyalı ekspertlərin və texniki nəzarət vasitələrinin də qoşulacağına ümid etdiyini bildirib.
Xatırladaq ki, ATƏT müşahidəçiləri bildiriblər ki, atəşkəs rejimi ayrı-ayrı hallarda pozulsa da ona "bütövlükdə riayət olunur".