"Putin Rusiyaya mesaj verir ki, bütün daxili ziddiyyətlər güc tətbiqi ilə həll ediləcək".

Axar.az xəbər verir ki, bu açıqlama ilə politoloq Ərəstun Oruclu öz Feysbuk səhifəsində çıxış edib. O, dünən Rusiyada keçirilən "sülh marşı"nın Kremli təşvişə saldığını bildirib:

"Prezident Putinin sərəncamı ilə Rusiya Daxili Qoşunlarının Xüsusi Təyinatlı Diviziyasına Feliks Dzerjinskinin adı qaytarılıb. Bolşevik-sovet ÇK-NKVD-KQB repressiya maşınının banisinin adının məhz indi bərpa edilməsi heç də təsadüfi görünməməlidir. Xüsusilə də son bazar günü Rusiyanın xeyli şəhərlərini əhatə edən "Sülh marşı"ndan sonra. Xatirinizdədirsə, dünən Rusiyanın onlarla şəhərində "Ukraynada müharibəyə yox!" şüarı altında on minlərlə vətəndaş Putin hakimiyyətinin Ukrayna siyasətinə etiraz aksiyasına çıxdı. Belə bir fəallıq Kremli təşvişə salmaya bilməzdi və reaksiyadan göründüyü kimi, belə də oldu. Unutmayaq ki, bu diviziya sovet rejiminin daxili iğtişaşları yatırmaq üçün yaratdığı xüsusi elit hissədir və indiki məqamda onu bu cür qabartmaqla Putin Rusiyaya mesaj verir ki, bütün daxili ziddiyyətlər güc tətbiqi ilə həll ediləcək. Ehtiyac olarsa, lap kütləvi repressiyalarla. Bu, həm də dolayısilə keçən əsrin 30-cu illərinin repressiyalarını təmizə çıxarmaq məqsədi güdür. Eynilə, necə ki, indi bizdə özünü "solçu", "kommunist" və s. adlandıran bəzi qruplar siyasi cəsədləri millətin qanı içində üzən bolşevik babalarını az qala millətin ən dəyərli nümayəndələri kimi təqdim etməyə çalışırlar..."