Dağıstanda prezident seçkilərindən sonra vəziyyət xeyli dərəcədə dəyişib. Ötən ilin sentyabrında prezident seçilən Ramazan Abdullatipov baş nazirin keçmiş birinci müavini Abbas Abbasovla birləşərək Dərbənddə yeni biznes şəbəkəsini qurmaq istəyir.

Dərbənd sakinlərinin Axar.az əməkdaşına dediyinə görə, Dağıstan prezidentinin bu planı A.Abbasovun maraqlarına uyğun gəldiyi üçün ona köməklik göstərir:

"Abbas Abbasov lobbiçiliyini etdiyi Abdulatopovun əli ilə büdcədən böyük pullar mənimsəmək istəyir. O, guya Dərbənddə 5 min nəfərin işlədiyi fabrik işə salacağını söyləyib. Qəzetlər yazır ki, bu, sadəcə büdcədən böyük pul qoparılması üçün uydurulan bir layihədir. Digər tərəfdən də özəlləşmədə böyük yağlı tikələrə sahib olmaq istəyirlər. 5 min nəfər işçi qüvvəsi olan zavod heç Rusiyada yoxdur. Gəlib burada, çoxmillətli bir regionda bunun reallaşdırılması inandırıcı deyil. Sadəcə Abbasov hakimiyyətdə olan Abdulatopovdan istifadə edərək onun əli ilə milyonlar qazanmaq istəyir".

Cütlük digər azsaylı xalqlardan istifadə edərək, milli ayrı-seçkilik üçün zəmin də yaradır:

"Abbasov-Abdullatipov cütlüyü Sadvalı, Ləzgi Milli təşkilatını, Avar Milli Təşkilatını da araya qatıblar. Bu mübarizədə daha çox adıçəkilən millətçi təşkilatlar görünür. Onların qüvvəsindən istifadə etmək istəyirlər. Bunların hazırki siyasəti budur ki, azərbaycanlılar Dağıstanın yerli əhalisi deyil. Bizlər buradan köçməliyik".

Bakı-Dərbənd-Bakı