Rusiya kənd təsərrüfatına nəzarət xidməti və sərhədçilər Polşa alma və armudunun qonşu Qazaxıstan ərazisindən Rusiyaya daxil olmasının qarşısını alıblar.

Axar.az RİA Novosti-yə istinadən bildirir ki, bu barədə nəzarət xidmətinin Omsk vilayəti üzrə bölməsindən xəbər veriblər.

"Beynəlxalq "İsilkul" avtomobil buraxılış məntəqsində 19,6 ton Polşa alma və armudunun Qazaxıstan Respublikası ərazisindən keçməklə Rusiya Federasiyasına daxil olmasının qarşısı alınıb", - deyə məlumatda bildirilir.

Meyvə bağlamalarını nəzarətdən keçirən xidmət əməkdaşları onların üzərində Polşaya məxsus etiketləri aşkar ediblər. Bütün yük saxlanılıb və Rusiya ərazisinə buraxılmayıb. Qaydanı pozan tərəf cərimə ödəməli olacaq.

Qeyd edək ki, Rusiya ilə Qərbin münasibətləri Ukraynadakı vəziyyətlə əlaqədar pisləşib. İyulun sonlarında AB və ABŞ ayrı-ayrı fiziki şəxlərə və şirkətlərə qarşı sanksiyalardan Rusiya iqtisadiyyatına qarşı tədbirlərə keçib. Rusiya da cavab olaraq ona sanksiya tətbiq etmiş ölkələrdən – ABŞ, AB ölkələri, Kanada, Avstraliya və Norveçdən ərzaq məhsullarının idxalına qadağa qoyub.