ABŞ Milli Təhlükəsizlik Agentliyinin (NSA) keçmiş üzvü Eduard Snoudenin vəkili Anatoli Kuçerenanın müvəkkilinin həyatından bəhs edən "Vremya Spruta" (Osminoq zamanı) adlı əsəri satışa çıxarılıb.

Axar.az xəbər verir ki, Kuçerena əsərində Moskvaya sığınan Snoudenin ilk günlərini detallı şəkildə izah etməyə çalışıb. O, Snoudenə "Joş Cold" adını verərkən qəhrəmanının keçmiş Sovet lideri Nikita Xruşşovun 30 metr yerin dərinliyindəki gizli sığınacağında qaldığını və Rusiya mədəniyyəti ilə tanışlığını qələmə alıb. Ayrıca ABŞ agentinin gizli sığınacaqda yaşayan ilk adam olduğu ifadə edilib.

Əsərin qəhrəmanı hadisəni öz dili ilə belə ifadə edir:

"Mən ABŞ ilə yaxşı münasibətlərdə olmayan ölkələrin aerodromlarından istifadə etmək istəyirdim. Məsələn, Çin, Rusiya, Kuba, Ekvador, Boliviya və Venesuela".

Kitabın müqəddiməsində əsərdəki hadisə və insanların xəyal məhsulu olduğu və günümüzdəki bəzi bənzərliklərin isə təsadüf olduğu bildirilir.

Digər tərəfdən vəkil Kuçerena kitabı yazdıqdan sonra Snoudenə verdiyini, keçmiş kəşfiyyatçının əsəri çox bəyəndiyini deyib. Bundan başqa o, müvəkkilinin ABŞ-a qayıtmaq istəyini də gizlətməyib. Ayrıca Kuçerena əsərinin istifadə hüququnun Hollivud rejissorlarından Oliver Stona məxsus olduğunu deyib.

Xatırladaq ki, Snouden 2013-cü ildə ABŞ və Britaniya kəşfiyyatına məxsus gizli materialları "Vaşinqton Post" və "Qardian" qəzetlərinə ötürüb. Daha sonra o, Honkonqa qaçıb və ordan da Rusiyaya keçib.