Ana səhifə Planet |
COVİD-19 pandemiyasına qarşı mübarizədə müsbət nəticələr əldə edən ölkələrdən biri kimi Sloveniya hökuməti də karantin qaydalarının yumşaldılması qərarını verib.
Axar.az Azərtac-a istinadən xəbər verir ki, aprelin 20-dən etibarən bu ölkədə texniki avadanlıqlar, mebel və tikinti malları satan mağazalar yenidən açılıb. Eyni zamanda, avtomobil təmiri sexləri və digər təmir emalatxanaları fəaliyyətlərini bərpa edib. Açıq havada aparılan işlər (binaların bayırdan rənglənməsi və təmiri, bağçılıq məhsullarının satışı) yenidən həyata keçirilə bilər, eyni zamanda, qida məhsullarının küçə satışına da icazə verilib.
Hökumətin qərarına əsasən, sahəsi 400 kvadratmetrədək olan digər ictimai iaşə obyektlərinin (bərbərxana və kosmetika salonları da daxil olmaqla) fəaliyyəti iki həftədən sonra bərpa ediləcək.
Sloveniyada koronavirus infeksiyası ilkin mərhələdə sürətlə yayılsa da, hökumətin gördüyü məhdudlaşdırıcı tədbirlər nəticəsində yoluxma hallarının sayı azalıb. Hazırda ölkədə 1330 yoluxma halı qeydə alınıb, 192 nəfər virusdan sağalıb, ölənlərin sayı isə 74 nəfərdir. Ölkədə karantin dövründə vətəndaşların öz yaşayış məntəqəsini tərk edərək başqa yerə getməsi yalnız xüsusi icazə ilə mümkündür.
Tarix
2020.04.20 / 20:48
|
Müəllif
Axar.az
|