Yunanıstan beynəlxalq qanunları pozaraq etdiyi hərəkətlərlə Qərbin “ərköyün uşağı” fikrini formalaşdırır.

Axar.az xəbər verir ki, bunu türkiyəli siyasi şərhçi Səlim Gökçən deyib.

“Türkiyə heç bir şərt olmadan Yunanıstanla kontinental şelf məsələsini, adalar, hava məkanı, qazma işlərini, Şərqi Aralıq dənizi və digər ikitərəfli mövzuları danışmağa hazır olduğunu deyib. Yunanıstan isə sadəcə kontinental şelf və dəniz sərhədləri məsələlərinin müzakirəsində maraqlıdır. Açığı, Yunanıstan iki ölkə arasındakı gərginliyin davam etməsinin tərəfdarıdır. İrəli sürülən həll variantının onların maraqlarına uyğun olmayacağını düşünürlər”, - S.Gökçən bildirib.

Siyasi şərhçi qeyd edib ki, Türkiyə və Yunanıstan arasındakı problem sadəcə Egey dənizindəki kontinental şelf məsələsindən ibarət deyil:

“Bölgədə yerləşən qayalıqlar, adacıqlar və adaların Lozanna müqaviləsinin əksinə olaraq silahlandırılması Türkiyə üçün problem yaradır. Bundan başqa, Kipr məsələsi, Qərbi Trakyada yaşayan türklərin statusu və digər problemlər iki ölkə arasında hər zaman davam edib. Yunanıstan beynəlxalq qanunları pozaraq etdiyi hərəkətlərlə Qərbin “ərköyün uşağı” fikrini formalaşdırır. AB və Qərbin tarix boyu Yunanıstanın Türkiyə əleyhinə təşəbbüslərə dəstək verməsi bu münasibətin əsas səbəbidir”.