Gürcüstan Daxili İşlər Nazirliyi Zuqdidi şəhərində bankda insanların girov götürülməsi hadisəsini terror aktı adlandırıb.

Axar.az xəbər verir ki, Gürcüstan DİN üç maddə ilə istintaqın aparıldığını bildirib.

"Təəssüf ki, bəzi media nümayəndələri müəyyən edilmiş şəxslə əlaqəli materialları yaymamaq çağırışımızı dinləmədilər və nüfuzdan salmaq məqsədilə həm istintaqa, həm də polis tədbirlərinə mane yaradaraq, terror aktında şübhəli bilinən şəxsin təfərrüatlarını açıqladılar”, - deyə bildirilib.

Nazirliyin məlumatına görə, istintaq 3 maddə üzrə - qanunsuz silah daşımaqda şübhəli bilinmək, terror aktının icrası və terrorizm məqsədilə insanları girov götürmək maddələri üzrə aparılır.

Qeyd edək ki, Zuqdididə bank şöbəsində insanları girov götürən maskalı şəxsin əvvəlcə polisə təslim olduğu deyilsə də, sonradan onun qaçdığı məlum olmuşdu.