Bu vəziyyət Belarus hakimiyyət orqanlarının müxalif səsləri susdurmaq üçün bir başqa açıq cəhdidir.

Axar.az xəbər verir ki, bunu Avropa Birliyinin baş diplomatı Jozep Borrell deyib.

O, beynəlxalq aviasiya qaydalarının pozulduğunu müəyyənləşdirmək üçün hadisə ilə bağlı istintaqın aparılmasının vacibliyini vurğulayıb:

"Bugünkü vəziyyət AB Şurası iclasında gündəmə gətiriləcək. Avropa Birliyi günahkarlara qarşı tədbirlərin alınması daxil olmaqla, hadisənin nəticələrini dəyərləndirəcək".

Borrell Protaseviçin dərhal sərbəst buraxılmasını tələb edib.

Qeyd edək ki, Afinadan Vilnüsə uçan təyyarə Minskdə təcili eniş edib. Əvvəlcə bildirilib ki, təyyarədə bomba var və axtarış aparılacaq. Daha sonra bomba məlumatının yalan olduğu üzə çıxıb. Əvəzində isə təyyarədə olan “Nexta” Teleqram kanalının keçmiş rəhbəri, Belarusun ekstremist elan etdiyi Roman Protaseviç saxlanılıb.