Türkiyədə bir neçə il əvvəl virtual “Çiftlik Bank” şəbəkəsi yaradaraq insanları aldadan və bu səbəbdən xaricə qaçmağa məcbur olan Məhməd Aydın vəkilləri vasitəsilə videomüraciət yayıb.

Axar.az xəbər verir ki, M.Aydın çıxışında Türkiyəyə qayıdaraq hüquq-mühafizə orqanlarına təslim olacağını bildirib.

O qeyd edib ki, “virtual ferma” yaradarkən sadəcə qanuni olaraq gəlir əldə etmək məqsədi güdüb. Lakin ətrafdakı pisniyyətli insanların qeyri-sağlam rəqabət aparması, ədalətsiz gəlir etməsi nəticəsində özü də çıxılmaz vəziyyətə düşüb:

“Xaricdə olduğum müddətdə günahsızlığımı sübut etmək üçün əlimdən gələni etdim. Lakin barəmdə başladılan istintaq, ardınca həbs qərarı buna mane oldu. Günahsızlığımı sübut etmək üçün məhkəməyə müraciət edəcəyəm”.

Qeyd edək ki, “Çiftlik Bank”a külli miqdarda vəsait yatıran yüzlərlə insanın pullarını mənimsəyərək 2018-ci ildə xaricə qaçan “Tosuncuk” ləqəbli Məhməd Aydın barəsində dələduzluq ittihamı axtarış elan edilib.