Rusiyanın nüfuzlu "Komsomolskaya Pravda" qəzeti Suriyada başlayan hərbi əməliyyatlardan yazıb.

Axar.az xəbər verir ki, dərgidə yer alan analizdə Rusiyanın Suriyaya hərbi müdaxilə etməsi ilə bağlı maraqlı məqamlara toxunulub.

Qəzet Moskvanın İŞİD-i özünə real təhlükə hesab etdiyini yazaraq, əməliyyatların sonrakı gedişatı ilə bağlı bir sıra proqnoz verib:

Rusiyanın milli maraqları var

"İŞİD sıralarında fərqli məlumatlara görə, 3-5 min arası MDB ölkələrindən gələn döyüşçü var. İŞİD-in uğuru davam edərsə, cihadçıların Rusiyaya qayıtma ehtimalı güclənir. Rusiya ilk növbədə bunun qarşısını almağa çalışır. Putin bunu Nyu Yorkda müsahibəsində dedi. Yəni Rusiya sadəcə Suriya üçün deyil, öz milli təhlükəsizliyi üçün önləyici əməliyyata başlayıb.

ABŞ bacarmadı

İŞİD artıq qlobal problemə çevrilib. ABŞ-ın uzaqdan koordinasiya edərək və terrorçularla tək başına döyüşən Əsəd ordusu ilə birlikdə hərəkət etmədən apardığı əməliyyatlar nəticə vermədi. Əksinə, problem daha da qarşısıalınmaz mərhələyə qədəm qoydu. Moskvanın Əsədin hərbi müdaxilə tələbini gözləməsi, planını Dəməşqlə bərabər digər kilid qüvvələrlə paylaşması, Bağdadda koordinasiya mərkəzi qurması və nəhayət ABŞ ilə razılığa gəlməsi lazım idi. ABŞ Moskvaya Əsədin getməsi müqabilində İŞİD-i birgə məhv etməyə razılıq vermişdi. Ancaq nəticə olaraq ABŞ Əsədin taleyi ilə əlaqədar mövqeyini dəyişdirdi və Moskva bunun qarşılığında Suriyada silahlı çevrilişi qəbul etmədi.

Rusiya Suriyada müharibəyə qoşuldu?

Xeyr, Rusiya bu gün müharibə aparmır. Moskva yalnız ölkəni terrorizmdən qurtara bilər. Vətəndaş müharibəsini həll etmək suriyalıların vəzifəsidir.

ABŞ və Rusiya əməliyyatlarının fərqi nədir?

Rusiya leqal Dəməşq hökumətinin çağırışına cavab verərək Suriyada beynəlxalq hüquqa tamamilə uyğun hərəkət edir. ABŞ və NATO ölkələri isə tam tərsinə, BMT qərarı olmadan və Suriyadan razılıq almadan əməliyyat aparır.

Moskva bu əməliyyata nə vaxt hazırlaşdı?

Moskva bu ilin əvvəlində Suriyaya silah göndərilməsinə qərar verib. Buna paralel olaraq ölkəyə bir qrup rusiyalı hərbi ekspert göndərdi. Rusiya döyüş təyyarələri İran-İraq üzərindən bölgəyə göndərilərək Lazkiyə bazasına yerləşdirilib.

Rusiya Suriyaya qoşun yeridəcək?

Hələlik yalnız hava hücumlarından bəhs edilir. Təkcə Rusiya təyyarələri deyil, Suriya, İraq, İran təyyarələri də əməliyyatlara qatılacaq. Raket əleyhinə müdafiə sistemləri olan Rusiya gəmiləri də Aralıq dənizində müəyyən mərhələdə iştirak edə bilər. Ancaq Putinin də dediyi kimi, quru əməliyyatı qətiliklə olmayacaq.

Rusiyanın qazancı nə olacaq?

Rusiyanın Suriyada tək başına müvəffəqiyyət əldə etməsi qeyri-mümkündür. Kəşfiyyat məlumatlarına görə, bu gün İŞİD sıralarında 70-80 min, bəzi məlumatlara görə isə 120 min döyüşçü var. 50 Rusiya təyyarəsi belə böyük bir təşkilatı yox edə bilməz. Digər ölkələrlə birlikdə böyük hərbi ittifaq qurulması lazımdır.

ABŞ-Rusiya əlaqələri necə olacaq?

Ortaq düşmən İŞİD-ə qarşı Rusiyanın başlatdığı savaş Qərblə münasibətləri yumşalda bilər. Tərəflər səylərini birləşdirib İŞİD-i yox edərsə, bu, Rusiya ilə Qərbin ortaq zəfəri olar və iqtisadi sanksiyalar aradan qalxa bilər".