Beynəlxalq Arbitraj Məhkəməsi təbii qazın qiyməti ilə bağlı Türkiyənin lehinə qərar çıxarıb. İran tərəfindən Türkiyəyə satılan qazın qiymətinin 13-15 faizi rəsmi Ankaraya cərimə olaraq ödəniləcək.

Axar.az xəbər verir ki, bu sözləri İranın Neft naziri Bijen Namdar Zengene deyib.

Nazir ödəniləcək məbləğin gizli saxlanıldığını deyib:

"İranın Türkiyəyə ödəyəcəyi məbləğ çox deyil. Türkiyə tərəfi məhkəmədə qazın qiyməti ilə bağlı istədiyi endirimi ala bilməyib. Qərar Türkiyənin tələbindən fərqlidir".

Qeyd edək ki, Beynəlxalq Arbitraj Məhkəməsi fevralın 2-də Türkiyənin İrandan aldığı qazın qiymətinin endirilməsi iddiasını təmin edib. Yayılan məlumatda Türkiyənin 35 faiz endirim tələbinə qarşı 10-15 faiz cərimə qərarı verildiyi bildirilirdi.

Buna baxmayaraq, İran tərəfi bu barədə məhkəmə qərarının hələ elan edilmədiyini və yayılan məlumatın doğru olmadığını açıqlamışdı.