Suriyadakı qarşıdurmalar Türkiyənin hüdudlarından kənarda baş verən hadisələrdir. Biz “Heyət Təhrir əş-Şam” qruplaşmasını uzaqdan tanıyırıq, özbaşına hərəkət edirlər, amma onlara göstəriş verənlər də ola bilər.

Axar.az xəbər verir ki, bunu Türkiyənin sabiq milli müdafiə naziri, millət vəkili Hulusi Akar deyib.

Sabiq nazir bildirib ki, Ukrayna müharibəsi ilə əlaqədar Rusiyada yorğunluq və passivlik hökm sürür:

“Rejim (Suriya – red.) əleyhdarı qruplar passivlikdən istifadə edirlər. PKK/YPG-nin nə olduğu Türkiyəyə aydındır. Çox diqqətli davranmalı və lazımi təhlükəsizlik tədbirləri görməliyik. Hadisələri Türkiyə Xarici İşlər Nazirliyi izləyir. Ən ciddi sual budur: Onlar əldə etdikləri bölgələri möhkəm saxlaya biləcəklərmi?”

H.Akar eyni zamanda qeyd edib ki, Əsəd də hərəkətə keçəcək:

“Belə görünür ki, o, hələ tədbir görməyib. Bu hərəkatın ən böyük həssaslığı Rusiya və rejimin hava qüvvələridir. Bunları yaxından izləmək və boşluqlara yol verməmək vacibdir. Əsəd vaxtında bizimlə əməkdaşlıq etsəydi, iş bu mərhələyə gəlməzdi”.

Qeyd edək ki, “Təhrir əş-Şam” qruplaşması bir neçə gün öncə hücuma başlayıb və onlarla kəndi, o cümlədən Hələb, İdlib və Tel-Rıfatı ələ keçirib.