Mülki vətəndaşları öldürmək istəmədiyi üçün ordudan ayrılan və rejimin 7 dəfə edam hökmü çıxardığı Qolan türkmanlarından olan pilot, polkovnik Əhməd Akkaş İordaniyada 12 illik sürgündən sonra Dəməşqdəki evinə qayıdıb.

Axar.az xəbər verir ki, bu barədə Türkiyə mediası məlumat yayıb.

Vətəninə 12 il sonra geri qayıdan pilot evini xarabalıqlar içərisində görüb. Akkaş bildirib ki, rejimin cinayətlərinə şərik olmamaq üçün ailəsi ilə birlikdə Suriyanı tərk edib:

"96-cı eskadron pilotlarının Dumada yaşayış məntəqələrini bombaladığını əks etdirən videonu gördüm. Boş ərazidən danışmıram. Uşaqları, qadınları, günahsız insanları öldürdülər. Videoya baxanda gördüm ki, bu əli qanlı rejimdir. Haqqın və ədalətin tərəfində olmalıyam dedim və ordunu tərk etdim. Ordudan ayrılandan sonra rejim məhkəməsi 12 ildə 7 dəfə haqqımda ölüm hökmü çıxardı. Sadəcə qan tökməkdən imtina etdiyim üçün. Onlar kimi olmaq istəmədim”.

Akkaş gələcəyə ümidlə baxdığını və Türkiyə Prezidenti Rəcəb Tayyib Ərdoğana sevgilərini ifadə edib:

“Allah ona uzun ömür versin. Rəcəb Tayyib Ərdoğanı həqiqətən bütün qəlbimlə sevirəm. Allaha şükürlər olsun ki, ölkəmizə qayıtdıq”.