Xorvatiya Baş nazirinin müavini Yosip Dabro hərəkətdə olan avtomobildən atəş açması ilə bağlı görüntülər yayıldıqdan sonra istefa verib.

Axar.az xəbər verir ki, bu barədə BBC məlumat yayıb.

Videoda Dabronun sərnişin oturacağında oturduğu, söhbət etdiyi, güldüyü və yüksək səsli musiqi sədaları altında oxuduğu, silahını çıxarıb açıq pəncərədən qaranlığa atəş açdığı görünür.

İfrat sağçı millətçi Vətən Uğrunda Hərəkat Partiyasını təmsil edən Dabro videonun bir neçə il əvvəl lentə alındığını və təlim güllələri atdığını deyib.

Kənd təsərrüfatı, meşə və balıqçılıq naziri olan Dabro sosial şəbəkədə yerləşdirdiyi istefa məktubunda hökumətin diqqətini yayındırmaq istəmədiyini bildirib. O, nazirlikdə islahatların aparılması planları ilə bağlı "əhəmiyyətli təzyiq və təhdidlərə" məruz qaldığını vurğulayıb.

Qeyd edək ki, Dabronun partiyası Baş nazir Andrey Plenkoviçin mərkəz sağ Xorvatiya Demokratik İttifaqı partiyası ilə koalisiya hökumətinin bir hissəsidir.