Yanvarın 18-də Tehranda Ali Məhkəmənin iki hakimini öldürən şəxsin kimliyi məlum olub.

Axar.az xəbər verir ki, o, 38 yaşlı Fərşad Əsədidir.

Məlumata görə, Tehranın azərbaycanlıların kompakt yaşadığı Qala Həsən xan bölgəsindən olan Əsədi 10 il əvvəldən Ali Məhkəmədə çayçı işləyib.

“O, son aylar hökumətə müxalif İran Xalq Mücahidləri təşkilatına üzv olduqlarna görə həbs edilən şəxslərin barəsində hansı hakimlərin edam hökmü verməsini araşdırıb”, - yerli mənbələrin yaydığı məlumatda bildirilir.

Xatırladaq ki, yanvarın 18-i yerli vaxtla saat 10:40 dəqiqədə Fərşad Əsədi İran Ali Məhkəməsinin binasında Ali Məhkəmənin 53 saylı şöbəsinin müdiri Məhəmməd Müqeysə və Ali Məhkəmənin 39 saylı şöbəsinin müdiri Əli Razini qətlə yetirib, sonra isə intihar edib.

Qeyd edək ki bu, İran Ali Məhkəməsi binasında baş verən ikinci oxşar hadisədir.

Bundan əvvəl 11 mart 1946-cı ildə də, radikal "İslam Fədailəri" təşkilatının üzvləri Ali Məhkəmənin binasında azərbaycanlı hüquqşünas, siyasətçi, tarixçi və alim Əhməd Kəsrəvi və müavinini Məhəmmədtağı Həddadpuru güllə və bıçaq zərbələri ilə qətlə yetiriblər.