Ermənistan parlamentinin Avropaya inteqrasiyası üzrə daimi komissiyasında “Ermənistanın AB-yə qoşulması prosesinin başlanması haqqında” qanun layihəsinin müzakirəsi zamanı hakim partiyadan olan deputat Sona Qazaryan bildirib ki, baş nazirin bu məsələlərlə bağlı yeni müavininin olması zəruridir.

Axar.az xəbər verir ki, erməni mediası Baş nazirin müavini Mger Qriqoryana qarşı dərin inamsızlıq olduğu, hətta onun “Rusiya casusu” hesab edildiyi üçün bu təklifin səsləndiyini yazıb.

İddia edilib ki, məhz bu səbəbdən Ermənistanın Avropaya inteqrasiya məsələsinə Mger Qriqoryanın rəhbərlik etməsi məqbul sayılmayıb.

“Təbii ki, Mülki Müqavilənin deputatı bunu etiraf etmədi, əksinə, Mger Qriqoryanın öz funksiyaları, eləcə də sərhədin demarkasiyası komissiyasının işi ilə çox məşğul olduğunu, Tiqran Xaçatryanın isə maliyyə məsələlərini koordinasiya etdiyini bildirdi. Ona görə də təklif edildi ki, baş nazirin Avropaya inteqrasiya məsələləri üzrə yeni müavini olsun”, - “Hraparak” qeyd edib.