Ukrayna Təhlükəsizlik Xidmətinin tapşırığı ilə bir sıra təxribat törətmiş Rusiya vətəndaşı Moskva vilayətində FTX əməkdaşları tərəfindən saxlanılıb. O, ölkədən qaçmaq istəyib, lakin ukraynalı kuratorlar ona kömək etməyib və əlaqəni kəsiblər.

Axar.az xəbər verir ki, bu barədə Rusiya Federal Təhlükəsizlik Xidməti məlumat yayıb.

Məlumata görə, Ukraynanın göstərişi ilə 2023 və 2024-cü illərdə silsilə diversiya və terror aktları törətməkdə iştirak edən 1979-cu il təvəllüdlü Rusiya vətəndaşı Moskva vilayətində saxlanılıb.

Saxlanılan şəxsin sözlərinə görə, 2023-cü ilin mart ayında Yutubda şərhlərdə özünü Ukrayna Təhlükəsizlik Xidmətinin zabiti kimi təqdim edən və əməkdaşlıq təklif edən şəxslə tanış olub:

“O, Rusiya ərazisində bir sıra yanğın və təxribatların həyata keçirilməsini əhatə edən tapşırıqlar verib. Təhlükəsizlik, sui-qəsd və partlayıcı qurğuların istehsalı ilə bağlı təlimatlar aldıq. Təhlükə yaranarsa, xaricə qaçmağa yardım edəcəklərinə dair söz də verildi. Sonuncu təxribatdan sonra özümü təhlükəsiz hiss etmədiyim üçün ondan xaricə getməyə dəhliz istədim. Müraciətimdən sonra mənimlə əlaqə saxlamadılar”.