Kanada, Çin və Meksikanın hakimiyyət orqanları yaxın 24 saat ərzində Vaşinqtonun bu ölkələrin məhsullarına rüsum tətbiq etməsindən yayına bilməyəcək.

Axar.az xəbər verir ki, bunu ABŞ Prezidenti Donald Tramp Ağ Evdə jurnalistlərin suallarını cavablandırarkən deyib.

Tramp sözügedən dövlətlərin hadisələrin belə inkişafının qarşısını almaq üçün hər hansı bir şey edə biləcəyi barədə suala cavabında, "Xeyr, heç bir şey. Hazırda yox", - deyib:

"Xeyr. Bu, təmiz iqtisadiyyatdır. Bizim hər üç ölkə ilə böyük (ticarət - red.) kəsirimiz var. Bir halda külli miqdarda fentanil (sintetik opioid - red.) göndərir, onunla ildə yüz minlərlə insanı öldürürlər. Digər iki halda isə bu zəhərin xaricdən gətirilməsinə şərait yaradırlar”.

Amerika lideri əmin edib ki, ABŞ tariflərin tətbiqi ilə heç bir güzəştə getmir.