Təkcə bu gün Rusiya hərbçiləri Ukraynaya 267 “Şahid” PUA-sı ilə hücum edib.

Axar.az xəbər verir ki, bu sözləri Ukrayna Prezidenti Vladimir Zelenski mətbuat konfransında deyib.

O bildirib ki, Ukraynada seçkilərlə bağlı məsələ Rusiya tərəfindən qaldırılıb:

“Bu gün ABŞ-da da bu fikir səslənməyə başlayıb. Bu, ciddi və təhlükəli dalğadır. Ukrayna üçün seçkilərin keçirilməsi son dərəcə vacibdir, lakin müharibə şəraitində bu, mümkün deyil. Müharibə zamanı insanlar, hərbçilər necə səs verəcəklər? 267 pilotsuz təyyarə hücum edərkən necə səs verə bilərsiniz?”

O, ABŞ-ın Rusiyanın müharibənin bitməsini istədiyi barədə bəyanatlarını tənqid edərək, işğalçıların kütləvi hücumlarını davam etdirdiyini xatırladıb:

“Amerikalılar deyirlər ki, ruslar müharibənin bitməsini istəyir. Yalnız müharibə istəyən adam 267 PUA ilə hücum edir. Sum və Xarkov vilayətlərində səsvermə necə olacaq? Kupyansk nə olacaq? Müşahidəçilər harada olacaq? Onlar cəbhəyə gedəcəklərmi?”