AB-nin fəal üzvü kimi Niderland üçün Avropa qonşuluğunun dinc və firavan olması çox vacibdir.

Axar.az xəbər verir ki, bunu Niderland XİN-in rəhbəri Kaspar Veldkamp İrəvanda erməni həmkarı Ararat Mirzoyanla birgə mətbuat konfransında deyib.

Veldkamp qeyd edib ki, İrəvan ətrafında qeyri-sabitlik narahatlıq doğurur və Niderland kömək etməyə hazırdır. Üstəlik, o, Rusiyadan asılılığı qeyri-sabitliyin demək olar ki, əsas elementi adlandırıb:

“Amsterdam bunu azaltmağa kömək etməyə hazırdır”.

Nazir Ermənistan və Azərbaycanın sülhə nail olmaq üçün atdığı addımları konstruktiv hesab edib:

“Niderland öz növbəsində İrəvanla Ankara arasında dialoqu da asanlaşdırmağa hazırdır. Əminəm ki, tərəflərin münasibətləri normallaşdırmaq iradəsi var”.

Veldkamp Ermənistana da təsir edə biləcək rus feyklərinə xüsusi diqqət yetirib. Onun fikrincə, bu feyklər Ermənistanın Ukrayna və digər ölkələrlə münasibətlərinə mane ola bilər:

“Həmçinin Azərbaycanla münasibətlərdə gərginlik yarada bilər”.