2023-ci ilin iyununda Moskva üzərinə yürüş zamanı "Vaqner" özəl hərbi şirkəti (ÖHŞ) kolonundan "Ka-52" helikopterinə zərbənin videosu yayımlanıb.

Axar.az Oxu.az-a istinadla xəbər verir ki, kadrları rusiyalı hərbi bloger və pilot Aleksey Voyevoda özünün Teleqram kanalında dərc edib.

Kadrlarda hərbi texnika kolonu görünür, onun üzərindən helikopter uçur. Kolondan raket atılır, sursat "Ka-52"yə dəyir, helikopter alova bürünür və düşür.

Müəllif qeyd edib ki, onun yayımladığı videoda katapult sisteminin işə düşməsinin başlanğıcı - helikopter pərlərinin atılması görünür.

Xatırladaq ki, 2023-cü il iyunun 23-də "Vaqner" Xüsusi Hərbi Şirkətin başçısı Yevgeni Priqojin Rusiya Müdafiə Nazirliyini onun şirkətinin mövqelərinə zərbələr endirməkdə ittiham edib və 25 min insanın "məsələni aydınlaşdırmağa" hazırlaşdığını bildirib. O, Rostov və Voronejdə bütün hərbi obyektlərin nəzarətə götürüldüyünü açıqlayıb, sonra Moskva istiqamətinə irəliləməyə başlayırlar. Həmin gün Belarus Prezidenti Aleksandr Lukaşenko ÖHŞ rəhbəri ilə danışıqlar aparır, beləliklə "Vaqner" rəhbəri öz kolonlarını geri döndərir və onları səhra düşərgələrinə yollayır.