"Netfliks"in “Berlin polisi” serialının ulduzu, alman bodibilder Vittorio Pirbazari idman zalında ölüb.

Kult.az Publika.az-a istinadən xəbər verir ki, 44 yaşlı aktyor "Vito" ikinci evinə çevrilmiş idman zalında qəflətən dünyasını dəyişib.

Hadisə bazar ertəsi baş verib. Onun həmkarı Səid İbrahim sosial şəbəkədə faciəvi xəbəri təsdiqləyərək, Vitonu "on yaşlı uşaq kimi yumşaq qəlbli" insan adlandırıb.

İlkin məlumatlara görə, ölümün səbəbi infarkt ola bilər, lakin hələlik rəsmi təsdiq yoxdur.

Xatırladaq ki, yanvar ayında Pirbazari döş qəfəsindən əməliyyat olunub. Onun sağ döş qəfəsi əzələsi cırılıb və bu əzələ cərrahi yolla bərpa olunub. Əməliyyatdan sonra o, avtomobil qəzasına düşüb, fəqərəsi sınıb və yumşaq toxumaları zədələnib.

Martın 23-də aktyor 12 həftəlik fasilədən sonra idman zalına qayıtdığını elan etmişdi.

Ölümündən bir gün əvvəl o, son zamanlar aldığı zədələrə görə ləng qaçdığını bildirərək selfi paylaşıb.