Türkiyənin tanınmış hərbi eksperti Abdullah Ağarın 44 günlük Vətən müharibəsinin tarixi və strateji əhəmiyyətini ortaya qoyan “Qarabağ dastanı” araşdırması yaxın günlərdə işıq üzü görəcək.

Bu barədə Kult.az-a hərbi ekspert özü məlumat verib.

Ağarın sözlərinə görə, kitab müharibənin hüquqi, tarixi və insani aspektlərinə toxunur, xüsusilə şəhid və qazilərin fədakarlığını vurğulayır.

Qeyd edək ki, Türkiyənin Xüsusi Təyinatlı Qüvvələrində xidmət etmiş Ağar kitabın yazılması üçün 15 ay çalışıb və bu müddətdə 300-ə yaxın döyüş iştirakçısı ilə həmsöhbət olub. Kitabda Azərbaycanın zəfər yolu, qəhrəmanlıq hekayələri və strateji gedişləri ətraflı təsvir olunur.

O vurğulayıb ki, “Qarabağ dastanı” 1500 səhifəlik bir əsər olaraq, həm tarixi mənbə, həm də hərbi-strateji təhlil kimi qiymətləndirilə bilər. Kitab Azərbaycan, türk, rus və ingilis dillərində nəşr ediləcək və gələcək nəsillər üçün mühüm istinad mənbəyi olacaq.