Ukrayna Silahlı Qüvvələrinin Rusiyanın Kursk vilayətindəki əməliyyatı davam edir, qüvvələrimizin mühasirəyə alınması ilə bağlı heç bir məlumat doğru deyil.

Axar.az xəbər verir ki, bunu Ukrayna Prezidenti Vladimir Zelenski deyib.

O vurğulayıb ki, Rusiya atəşkəsin əldə olunmasını istəmir.

“Biz anlayırıq ki, Rusiya nə istəyir, növbəti addımları nə olacaq, onların hərbçiləri harada cəmləşir, harada atəşlərin, hücumların və irəliləyişlərin sayı artır. Məsələn, bu gün cəbhə xətti boyunca 200-dən çox hücum qeydə alınıb”, – deyə Zelenski bildirib.

Prezidentin sözlərinə görə, ruslar ukraynalı hərbçiləri Kursk vilayətindən tamamilə çıxarmaq üçün əllərindən gələni edirlər:

“Təbii ki, onların simvolik tarixləri var. Gələn ay onlar hansısa “qələbə addımlarını” göstərmək istəyəcəklər. Amma hələlik vəziyyət bizim nəzarətimiz altındadır. Biz oradayıq. Və bu bizim üçün çox vacibdir. Kursk istiqamətində böyük sayda rus hərbçisini – 64 min nəfəri – saxlayırıq”.