Daxili uçuşlarda xarici qonaqlar olmadığına görə sərnişinləri türk dilində salamlamaq və qarşılamaq ingilis dilində qarşılamaqdan daha vacibdir, ancaq bu, kimlərinsə qeyrətinə toxunur və türk dilində 30 saniyəlik danışığı qəbul edə bilmirlər.

Axar.az xəbər verir ki, bunu Təbrizin İran parlamentindəki millət vəkili Əlirza Novin deyib.

“Aylardır ki, Şərqi Azərbaycanın ATA aviaşirkətinin təyyarələrində qonaqlar fars və ingilis dili ilə yanaşı, türk dilində də qarşılanırdılar. Ancaq kimlərsə türk dilində “xoş gəldin” deməyi təhlükəsizliyə zidd hesab edib və qadağan edilməsini istəyir”.

Novin Təbriz reyslərində sərnişinlərin türkcə qarşılanması məsələsinin həm dövlət, həm də özəl sektor üçün həll olunduğunu deyib və bunu yenidən problemə çevirməməyi tövsiyə edib.

Qeyd edək ki, ötən ilin oktyabr ayında Şərqi Azərbaycana məxsus ATA aviaşirkətinin təyyarəsində sərnişinlərə Azərbaycan türkcəsində “xoş gəldin” deyilməsi bəzi dairələr və rəsmilərin etirazları ilə qarşılanmışdı. Buna baxmayaraq, Təbriz uçuşlarında azərbaycanlı qonaqların türkcə qarşılanması davam etdirildiyinə görə bir neçə gün əvvəl İran Mülki Aviasiya Təşkilatı xəbərdarlıq bəyanatı yararaq, bunun dayandırılmasını istəyib.