Mayın 25-nə keçən gecə Rusiya Ukraynaya kütləvi hücuma keçdi, nəticədə ölən və yaralananlar oldu. Lakin ABŞ Prezidenti Donald Tramp hələlik buna reaksiya verməyib.

Axar.az xəbər verir ki, bu barədə "Quardian" məlumat yayıb.

"Ağ Ev liderinin Rusiyanın Ukraynaya qarşı müharibəsini dayandırmaq cəhdlərinin uğursuzluğu getdikcə daha aydın görünür. Onun istənilən hərbi münaqişəni həll edə biləcəyinə dair əvvəlki inamı getdikcə azalır. Rusiya və Ukrayna arasında 2022-ci ilin martından bəri ilk birbaşa danışıqlar nəticəsiz başa çatıb.

Danışıqlar heç vaxt atəşkəs əldə etməyə kömək etməyib. Tramp Rusiya lideri Vladimir Putini zəiflətmək əvəzinə ona təzyiq etməkdən imtina edərək, ona daha da güc verib. ABŞ prezidentinin planı Kreml rəhbəri ilə razılığa gəlmək idi, lakin bu, baş tutmadı. Ukrayna və Rusiya zavodları minlərlə yeni dron istehsal edir. Moskva Ukraynanın hava hücumundan müdafiə sistemlərini aldatmaq üçün hazırlanmış çoxlu sayda yayındırıcı sistemlərdən istifadə etdiyinə görə müharibə getdikcə mürəkkəbləşir. Eyni zamanda, Ukrayna hərbi qüvvələri Rusiya bazalarına və hərbi texnika istehsal edən zavodlara zərbələr endirir. Ukrayna Prezidenti Vladimir Zelenski də Trampın susmasının Putini ruhlandırdığını deyib", - məqalədə qeyd olunub.