“Avropa üçlüyü”nün (Böyük Britaniya, Fransa və Almaniya) xarici işlər nazirləri və AB diplomatik xidmətinin rəhbəri Kaya Kallasın Cenevrədəki danışıqlarda Tehranın nüvə proqramı ilə bağlı səsləndirdiyi təkliflər real deyil, lakin İran onlara gələn həftə rəsmi cavab verəcək.

Axar.az xəbər verir ki, bu barədə "Röyters" adı açıqlanmayan yüksək rütbəli İran rəsmisinə istinadən məlumat yayıb.

Mənbə vurğulayıb ki, avropalılar öz təkliflərində israr etməkdə davam edərlərsə, bu, tərəfləri saziş bağlamağa yaxınlaşdırmayacaq:

"İstənilən halda İran Avropanın təkliflərinə Tehranda baxacaq və cavablarını növbəti iclasda təqdim edəcək. İranı uranın zənginləşdirilməsindən imtina etməyə məcbur etmək cəhdləri heç bir nəticə vermir. Bundan əlavə, Tehran özünün müdafiə imkanları, o cümlədən raket proqramı ilə bağlı danışıqlar aparmayacaq".