Bu il fevralın 24-də BMT Rusiyanın Ukraynaya hücumunun üçüncü ildönümünə təsadüf edən və ABŞ-ın müəllifi olduğu qalmaqallı qətnamə qəbul edib. Bu, təcavüzkarın və kimin qurban olduğunu göstərmədən yalnız sülh üçün amorf çağırışlardan ibarət idi. İndi məlum olub ki, amerikalı diplomatlar bu qətnamənin mətnini ruslarla razılaşdırıblar. Üstəlik, onlar bunu avropalı müttəfiqlərindən gizli ediblər.

Axar.az xəbər verir ki, bu barədə "Le Monde" məlumat yayıb.

Nəşr məqalədə Qərbin Rusiyanın Ukraynaya hücumu qarşısında aciz qalmasının bütün tarixini xatırladıb:

"2014-cü ildə ABŞ-ın eks-prezidenti Barak Obama Kiyevdə yeni qurulmuş inqilabi hökumətə Krımda ruslara müqavimət göstərməməyi tövsiyə etmişdi, çünki heç kim ukraynalılara silahla kömək etmək fikrində deyildi. Keçmiş prezident Co Bayden də 2022-24-cü illərdə eskalasiya qorxusundan daha çox yardım göstərməkdən çəkinirdi, onun ardınca isə Donald Tramp Ağ Evi ələ keçirdi. O, Ukrayna münaqişəsini 24 saat ərzində həll edəcəyinə söz verdi və bunu etmə tərzi avropalıları heyrətə gətirdi: Tramp özünü işğalçı adlandırmaqdan imtina edən Rusiya ilə birləşdi; müharibənin başlamasında Ukraynanı günahlandırdı və Zelenskini diktator adlandırdı. Vaşinqtonun bu yeni siyasətinin elementlərindən biri də BMT-də qalmaqallı qətnamə oldu. İlkin plan, Ukraynanın genişmiqyaslı işğalın ildönümündə avropalılar, amerikalılar və dünyanın əksər ölkələri tərəfindən səsə qoyulacaq qətnaməsini təqdim etmək idi. Lakin səsvermədən bir neçə gün əvvəl ABŞ-ın BMT-dəki müvəqqəti işlər vəkili Doroti Şi Fransanın BMT-dəki səfiri Nikolas de Rivyere və onun britaniyalı həmkarı Barbara Vudvorda bildirib ki, Birləşmiş Ştatlar Ukraynadan öz qətnamə layihəsini geri götürməsini istəyir, çünki o, öz qətnaməsini təqdim etmək fikrindədir. Vaşinqton Avropanın Amerikanın qətnaməsini dəstəkləyəcəyini gözləyirdi".