Almaniya Rusiyanın təcavüzü təhlükəsini nəzərə alaraq, Fransa və Böyük Britaniyanın nüvə arsenalına çıxış əldə etməlidir.

Axar.az xəbər verir ki, bu sözləri Bundestaqdakı Xristian Demokrat İttifaqı və Xristian Sosial Birliyi fraksiyasının lideri Yens Span deyib.

"Rusiyanın təcavüzü tamamilə yeni təhlükədir. Avropa çəkindirmə qabiliyyətinə malik olmalıdır. Amerikanın nüvə bombaları məhz bu məqsədlə Almaniyada yerləşdirilib. Amma bu, uzunmüddətli perspektivdə kifayət deyil. Biz Almaniyanın və ya Avropanın Fransa və Böyük Britaniyanın nüvə arsenalında - ola bilsin ki, digər Avropa dövlətləri ilə birlikdə - öz iştirakımızı müzakirə etməliyik.

Bunun üçün böyük vəsait tələb olunacaq, amma müdafiə istəyənlər onu da maliyyələşdirməlidir”, - Span bildirib.

O, həmçinin AB ölkələrini “müstəqil Avropanın nüvə çətiri” mövzusunda müzakirələrə çağırıb.