Rəşt Şəhər Şurasının üzvü və sərt fundamentalist dairələrə yaxınlığı ilə tanınan Rza Aşəri İran Prezidenti Məsud Pezeşkiana qarşı təhqiramiz ifadələrlə dolu bir çağırışla gündəmə gəlib.

Axar.az "Mouze"yə istinadla xəbər verir ki, Aşəri İnstaqram paylaşımında İsraili Pezeşkiyana qarşı sui-qəsd təşkil etməyə səsləyib.

“İsrail, bir yaxşılıq edərsən? Bizim prezidentimizi - İbrahim Rəisini öldürdün. Bu yeni prezident əvvəlkindən qat-qat inqilabçıdır. Ona da yüksək şəhadət nəsib etməyini xahiş edirik”, - deyə Aşəri yazıb.

O, habelə Pezeşkianın simasına və çıxışlarına ironik və təhqiredici şəkildə toxunaraq, onun “ölməyə hazır göründüyünü” bildirib.

Bu açıqlama Pezeşkiyanın Astara şəhərində ana dilində – türkcə etdiyi çıxışdan sonra səsləndirilib. Prezidentin bu addımı bölgə əhalisi tərəfindən böyük rəğbətlə qarşılanıb. Rəşt Şəhər Şurasının üzvünün çıxışı isə ölkə daxilində kimlik və dil məsələlərinin nə qədər həssas olduğunu bir daha göstərir.