Avropanın 18 rəsmi şəxsinin Gürcüstan hökuməti ilə bağlı məktubu bir daha bizə “dərin dövlət”in qeyri-rəsmi idarəçiliyinin Avropa Birliyi (AB) ölkələrinin böyük əksəriyyətində və Böyük Britaniyada nə qədər dərin kök saldığını xatırladır. Bu idarə altında artıq Avropa bürokratiyasında heç bir mənəvi sərhəd yoxdur.

Axar.az xəbər verir ki, bu barədə hakim Gürcü Arzusu-Demokratik Gürcüstan Partiyasının Siyasi Şurasının yaydığı bəyanatda deyilir.

Bəyanatda həmçinin qeyd olunur ki, “dərin dövlət”in Gürcüstan, Macarıstan, Slovakiya və Serbiyaya bağışlaya bilməyəcəyi yeganə şey müstəqillik və suverenlikdir.

"Yalnız bir prinsip var – ya ölkə "dərin dövlət" agentliyi tərəfindən idarə olunur, ya da o, Avropa rəsmilərinin daimi hücum obyektinə çevrilir. Onların Gürcüstan, Macarıstan, Slovakiya və Serbiyaya bağışlaya bilməyəcəyi yeganə şey onların müstəqilliyi və suverenliyidir" - bəyanatda bildirilib.