Oktyabrın sonlarında paytaxtımızda "Bu sizsiniz" adlı rəsm müsabiqəsi baş tutacaq.

Mədəniyyət və Turizm Nazirliyindən Axar.az-a verilən məlumata görə, müsabiqədə iştirak etmək istəyənlər öz rəsm əsərlərini oktyabrın 15-dək Xətai Sənət Mərkəzinin rəsmi Feysbuk səhifəsinin mesaj qutusuna göndərə bilərlər.

İştirak üçün portret janrında fərqli üslubda (qara qələm, quru fırça, pastel, kömür, akvarel, akril, gips, döymə və s.) ən azı 3 rəsmin fotosunu göndərmək lazımdır.

Göndərilən işlərə münsiflər heyəti tərəfindən baxış keçiriləcək.
Münsiflər tərəfindən seçilmiş iştirakçılar oktyabrın 24-də saat 16:00-da Xətai Sənət Mərkəzinə gələrək öz bacarıqlarını canlı olaraq nümayiş etdirəcəklər.

Sonra qaliblərin mükafatlandırılma (I yer - 500 manat, II yer - 300 manat, III yer - 100 manat) mərasimi baş tutacaq. Müsabiqənin bütün iştirakçıları diplomla təltif olunacaq.