Bəzən uğursuz həyat, saxta düşüncə tərzindən şikayətlənərək həyatımızın boşluqlarını axtarmağa çox zaman sərf edirik.

Bu sözləri psixoloq Rəvan Soltanov düşüncə tərzləri haqda Axar.az-a danışarkən deyib. R.Sultanov qeyd edib ki, bütün işlər təhtəlşüuri olaraq 6 mərhələdən keçir:

"Düşüncə - insan beyninin analitik qabiliyyətinin məhsuludur. Məhz düşüncənin sağlam olub-olmamasının nəticəsi olaraq biz ya uğur qazanırıq, ya da məğlub oluruq. Ümumiyyətlə, insan hər hansı bir uğurlu, yaxud uğursuz nəticəli işə başlamazdan öncə şüuraltı olaraq altı mərhələni keçmiş olur: 1. Niyyətinin formalaşması; 2. Cari iş haqqında düşünür; 3. Motivasiya; 4. Arzuların yaranması; 5. İcranın strategiyasının qurulması; 6. İşin icrası və nəticə.

Gördüyümüz kimi, istənilən işin nəticəsi insan niyyətindən birbaşa asılıdır. Yəni hər bir uğurlu, yaxud uğursuz işimizin başlanğıcını bizim niyyətimiz təşkil edir. Biz isə hər zaman uğurlu bir işin marağındayıq. Bu o deməkdir ki, hər bir iş haqqında düşünməzdən öncə niyyətimizi doğru istiqamətdə istifadə etməliyik. Babalarımız hədər yerə "niyyətin hara, mənzilin də ora" deməmişlər. Sağlam niyyət insanın şəxsiyyətinin birbaşa olaraq aldığı formadan asılıdır. Necə deyərlər – böyük insan böyük addımlar atar; ağıllı insan ağıllı işlərlə yadda qalar; ağıllı işlər isə ağıllı niyyət və düşüncə məhsuludur.

Düşüncələr insan niyyətinin aynasıdır. Yəni, istənilən insanın düşüncələri onun niyyətindən qaynaqlanır. Saf niyyətli insan adətən və çox zaman yalnız pozitiv, dəyərli və müsbət xarakterli işlər haqqında düşünür.

Motivasiya – doğru düşüncə tərzi, qəbullanma və intellektual mühitimizin birləşməsindən qaynaqlanan aktivlik xarakterli enerji növü və yaranmış müvafiq aura göstəricisidir. Bir işin icrasından öncə insanın ehtiyac duyduğu üçüncü mərhələ motivasiyadır, başqa sözlə desək, həvəsdir. Həvəs isə öz-özlüyündə bir işin icrasi ilə əlaqəli müsbət enerji toplusudur. Motivasiyalı – daima pozitiv qalmağın tək sirri stressdən, depresiyadan uzaq olmaqdır. Bu səbəbdən istənilən mövzu üzrə yarana biləcək gözləntilərdən uzaq olmalıyıq. Yəni, "depresiya=stress" aksiomundan qaçmalıyıq.

Arzular – insanların istənilən bir mövzu ilə bağlı planlarının virtual, mücərrəd formasıdır. Hədər yerə deyilməyib ki, istənilən real uğurlar bir zaman mövcud olan arzulardan qaynaqlanır. Bu səbəbdən arzular olmadan heç bir motivasiya, yaxud uğurdan danışmaq olmaz. Arzularımızın reallaşdırılması üçün hər zaman "necə edək? nə edək?" kimi suallarla tez-tez rastlaşırıq. Yəni şüuraltı olaraq icra strategiyasını düşünmüş oluruq. Bu isə təbii ki, beynin uğurlu bir iş üzrə son düşüncə mərhələsidir.

İşin icrası – düşünülmüş iş haqqında motivasiyalı arzuların uyğun icra strategiyasının reallaşdırılması mərhələsidir. Yuxarıda qeyd olunan hər bir mərhələni nəzərə alaraq uğura aparan sağlam düşüncə üzrə 6 qızıl qayda kəşf etmiş oluruq: 1. İstənilən işin nəticəsi insan niyyətindən birbaşa asılıdır; 2. Düşüncələr insan niyyətinin aynasıdır; 3. Motivasiya – doğru düşüncə tərzi, qəbullanma və intellektual mühitimizin birləşməsindən qaynaqlanan aktivlik xarakterli enerji növü və yaranmış müvafiq aura göstəricisidir; 4. Arzular – insanların istənilən bir mövzu ilə bağlı planlarının virtual, mücərrəd formasıdır; 5. Arzularımızın reallaşdırılması üçün hər zaman "necə edək? nə edək?" kimi suallarla tez-tez rastlaşırıq. Yəni şüuraltı olaraq icra strategiyasını düşünmüş oluruq; 6. İşin icrası – düşünülmüş iş haqqında motivasiyalı arzuların uyğun icra strategiyasının reallaşdırılması mərhələsidir.

Yekun olaraq deyə bilərik ki, uğura aparan istənilən yolun başlanqıc nöqtəsi strateji sağlam düşüncə tərzinə əsaslanır. Bu səbəbdən gəlin sağlam olaq, sağlam düşünək və uğur dolu bir həyat yaşayaq".