Dərman preparatlarının uzunömürlü olması həm də onların saxlama qaydalarına düzgün riayət edilməsindən asılıdır. Ancaq bir çoxları dərmanların hansı formada saxlanılmalı olduğunu bilmir. Bəziləri isə preparatların qablaşdırmasının üzərində qeyd edilən istehsal tarixinə diqqət etməklə kifayətlənir. Halbuki hər bir dərmanın öz saxlanma qaydası, temperaturu və şərti var.

Mövzu ilə bağlı Axar.az-a açıqlama verən pediatr Altay Abdullaoğlu bildirib ki, xüsusilə uşaqlar üçün nəzərdə tutulan dərmanların saxlanma qaydalarına mütləq şəkildə riayət olunmalıdır.

Həkim bildirib ki, suspenziya (sirop) halda olan preparatlar açıldıqdan 1 ay sonra atılmalıdır:

“Saxlanma müddəti keçməsə də, bu dərmanlar saxlamaq düzgün deyil. Toz halında olan dərmanlar isə ağzı açılıb sulandırıldıqdan 2 həftə sonra atılmalıdır. Toz dərmanlar daha qısa müddət saxlanılır. Çünki belə saxlanmış dərmanların təsir effekti azalmaqla bərabər, uşaqlara zərər də verə bilər.

Nəticə olaraq bildirmək istəyirik ki, bu cür dərmanlar uzun müddət qalarsa, istifadə etməyin. Bundan əlavə, bilmək lazımdır ki, istənilən sirop açıldıqdan sonra sərin, quru və uşaqların əli çatmayan yerdə mühafizə olunmalıdır”.

Həkim bildirib ki, antibiotiklər də daxil olmaqla, dərmanları açıqdıqdan sonra 7-10 gündən artıq saxlamaq yolverilməzdir:

“Lakin bəzi istisnalar da var. Bu istisnalar ümumi qaydaya zidd deyil. Yəni bəzi dərmanları həkim göstərişi ilə daha uzun müddət saxlamaq olar. Ancaq təbii ki, üzərində qeyd edilən saxlama temperaturu və qaydasına riayət edərək”.