Qonşu ölkələrdə delta ştammının yayılması sürətlənməyə başlayıb. Hətta Rusiyada üçüncü dalğa aşağıya doğru gedərkən yenidən vüsət almağa başladı. Azərbaycanın Rusiya, Gürcüstan və Türkiyə ilə sərhədləri açıqdır. Nə qədər virusla bağlı yoxlama testi aparılsa belə, delta ştammı Azərbaycana gələ bilər.

Axar.az xəbər verir ki, bu sözləri tanınmış həkim Vasif İsmayıl Musavat TV-də canlı yayım zamanı delta ştammının ölkəmizdə yayılması ilə bağlı fikrə münasibət bildirərkən deyib:

“Böyük ehtimalla Azərbaycana delta ştammı artıq gəlib, ya da yaxın vaxtlarda yayılacaq. Rusiya yalnız “Sputnik V” ilə əhalisini peyvənd edir. Əhalidə peyvəndlənməyə qarşı ciddi etiraz var. Gürcüstanda isə Avropadan gələn “Pfizer” peyvəndi tətbiq olunur. Burada əhalinin az qismi peyvənd olunub. Türkiyədə isə istifadə olunan peyvənd şirkətlərinin sayı daha çoxdur. Buna baxmayaraq əhalinin böyük hissəsi hələ də peyvənd olunmayıb. “Sputnik V”nin delta ştammını artıq qorumadığını söyləmək olar. Çünki tam peyvəndlənmiş insanlarda da delta ştammı artıq ölüm hallarına gətirib çıxara bilir”.

Uroloq bildirib ki, delta ştammı 2-3 dəfə yoluxma riskini artırır. Bu da epidemiyanın sürətlənməsini asanlaşdırır:

“Azərbaycanda əhalinin çox hissəsi “Sinovak”la peyvəndlənib. Hətta üçüncü dozanı vurmaq üçün yaxınlaşanlar var. Əgər Türkiyə və Gürcüstanda bu hal çox vüsət almasa və peyvənd olunmuş şəxslərdə bu ştammın ciddi yoluxma riski yaratmadığı müşahidə olunarsa, Azərbaycanda dördüncü dalğanın şiddəti haqda qorxmağa dəyməz. Delta ştammından qorunmaq üçün ölkəmizdə peyvəndlənmə sürətləndirilməlidir”.