"Dövlət hepatit C virusuna yoluxmuş şəxslərin müalicəsini öz üzərinə götürüb. İctimai Səhiyyə və İslahatlar mərkəzi bu xəstələri pulsuz müayinə etdikdən sonra lazımi dərmanlarla təmin edir".

Bu sözləri Axar.az-a açıqlamasında Səhiyyə Nazirliyinin Ümumi şöbəsinin inspektoru Xalidə Hüseynova yazıçı Kənan Hacının Hepatit C virusuna yoluxması və müalicəsinə yardım edilməsi ilə bağlı müraciətinə cavab olaraq bildirib. Nazirlik rəsmisinin sözlərinə görə, Hepatit B və C virusuna yoluxmuş şəxslərin müayinə və müalicəsinin təşkili üzrə xüsusi Komissiya yaradılıb:

"Səhiyyə Nazirliyində "B və C viruslu hepatitlərin profilaktikası, diaqnostikası və müalicəsinin təşkili üzrə Komissiyası" yaradılıb. Hazırda həmin komissiyanın rəyi əsasında virus hepatitli xəstələrin müvafiq dərman preparatları ilə təmin edilməsi İctimai Səhiyyə və İslahatlar Mərkəzinin binasında yerləşir. Komissiyanın sədri professor Murad Baxşıyevdir. Mərkəzin binası H.Zərdabi 96 ünvanındadır".

Xatırladaq ki, gənc yazar Kənan Hacı Aznews.az saytına açıqlamasında Hepatit C virusundan əziyyət çəkdiyini, xəstəliyinin şiddətləndiyini, iş qabiliyyətini itirdiyini bildirmiş, müalicəsinə yardım olunmasını xahiş etmişdi.