İndi də müdriklik yarışı başlayıb ki, guya Rüstəm İbrahimbəyova qarşı kampaniya aparılır.

Kult.az xəbər verir ki, bu sözləri millət vəkili Fazil Mustafa qeyd edib. O bildirib ki, əslində kampaniyaçılıq barədə deyilənlər Əkrəm Əylisliyə qarşı qismən də olsa aid edilə bilər:

“Çünki bizlər kitab oxuyan cəmiyyət olmasaq da, film seyr etməyi hamıdan çox sevirik. Əkrəm Əylislini böyük əksəriyyət oxumadan mühakimə etdi, ancaq Rüstəm İbrahimbəyovun yazdıqlarını oxumasaq da, filmə çəkdiklərini seyr etdik və şəhadət gətirdik ki, adam erməni ilə azərbaycanlının bir çox epizodlarda müqayisəsini verib və vəhşi azərbaycanlılarla mərhəmətli erməniləri ayrı-ayrı obrazlar vasitəsilə dünyaya tanıtmağa çalışıb. İstənilən şəxsə bu filmi detallarına qədər xırdalaya və bunun məqsədyönlü şəkildə Azərbaycana qarşı düşünülən bir ssenari olduğunu isbatlaya bilərəm”.

Millət vəkili vurğulayıb ki, xalqı, onun ayrı-ayrı personajlarını tənqid etmək əlbəttə olar:

“Mentalitetimizin yanlışlıqları ilə bağlı onlarla tablonu çılpaq şəkildə ədəbi mətndə yerləşdirmək hər bir istedadlı və vicdanlı yazarın borcu sayılmalıdır. Lakin erməni ilə müqayisə zəminində azərbaycanlı bir uşağın qatil kimi təqdim olunması və bu cür süjetin digər epizodlarda da təkrarlanması başqa bir təbliğatdan xəbər verir və bunu kampaniyaçılıq adı ilə malalamaq olmaz”.

Qeyd edək ki, Rüstəm İbrahimbəyov “Qafqaz üçlüyü” adlı film çəkib. Filmdə azərbaycanlılar vəhşi, qəddar, mədəniyyətsiz, ermənilər isə alicənab, sülhsevər, “vəhşi türkün qurbanı” kimi təqdim olunub.