Rahatlıqla deyə bilərəm ki, dünyada ilk dəfə belə bir ssenari əsasında film çəkilib.

Bu sözləri rejissor Aqil M. Quliyev yeni çəkdiyi filmi ilə bağlı Axar.az-a danışarkən deyib. Rejissor bildirib ki, "Şaman" filminin premyerası gələn il keçiriləcək:

"2016-cı ilin fevral ayında yeni çəkdiyim "Şaman" filminin premyerası nəzərdə tutulur. Filmin baş rollarında xalq artisti Amaliya Pənahova və Rus Dram Teatrının aktyoru Yuli Baleyin çəkilib. Bu filmi fərqli bir mistik janrda çəkmişəm. Filmin ssenarisi özümə aiddir. Rahatlıqla deyə bilərəm ki, dünyada ilk dəfə belə bir ssenari əsasında film çəkilib".

Rejissor bundan başqa yeni yazdığı əsər haqda da danışıb:

"Öz həyatım haqqında kitab yazmağa davam edirəm. Hələ ki, əsər bitməyib. Həbsdən çıxandan sonra davamını yazdım. Sonra belə bir qənaətə gəldim ki, bu əsər filmlə bitməlidir. Filmi təqdim edəndə kitabı da təqdim edəcəyəm. Bu əsəri şou-biznesdən gedəndən sonra yazmışam".