35 saylı Xətai üçüncü seçki dairəsinin Dairə Seçki Komissiyasında heç bir gərginlikdən söhbət gedə bilməz, dairə və məntəqələr Seçki Məcəlləsinə tam uyğun olaraq öz işini davam etdirir. Dairənin sədri İmran Hüseynəliyev isə səhhəti ilə bağlı ərizə yazaraq işdən uzaqlaşıb və müalicəyə gedib. O, bundan əvvəl də iki dəfə açıq ürək əməliyyatı keçirib.

Axar.az xəbər verir ki, bu sözləri Milletinsesi.az-a açıqlamasında 35 saylı DSK-nın katibi Dilarə İsmayılova deyib. Onun sözlərinə görə, dairə ərazisində namizədliyi qeydə alınmış namizədlərin təbliğat və təşviqat kampaniyaları çox aktivdir:

“Kiçik şikayətlər olsa da, ciddi heç bir pozuntu yoxdur və hər şey normaldır. O ki qaldı dairədəki gərginliyə görə DSK sədrinin “bəhanə edərək” istefa verməsi haqda yazılanlara, bunlar hamısı uydurmadır. İmran müəllim sinəsini açıb yarılmış bədənini göstərməlidir ki, mətbuat onun həqiqətən xəstə olmasına inansın? Namizədlərin arasındakı mübarizənin DSK-ya heç bir aidiyyəti yoxdur. Biz seçki prosesini həyata keçiririk, hər şey yüksək səviyyədədir və tam şəffaf seçki prosesi həyata keçiriləcək”.

Qeyd edək ki, parlament seçkilərində ən ciddi mübarizənin 35 saylı Xətai üçüncü seçki dairəsində gedəcəyi gözlənilir. Bu dairədən deputatlığa namizədlər Rauf Arifoğlu (“Yeni Musavat” Media Qrupunun rəhbəri) və İqbal Ağazadə (Ümid Partiyasının sədri) arasında ciddi rəqabət müşahidə olunur.

Bu ərəfədə DSK-nın sədri İmran Hüseynəliyevin səhhəti ilə bağlı işdən çıxarılması haqqında ərizə yazması isə sosial şəbəkələrdə birmənalı qarşılanmayıb.