Fransa Prezidenti Emmanuel Makron ölkəsinin parlamentinin “dqr”in tanınmasına çağıran qanun layihəsini qəbul edərsə, bu, ilk növbədə rəsmi Parisin özü üçün zərərli olacaq. Belə ki, Fransa bununla ATƏT-in Minsk Qrupundakı həmsədrliyindən öz xoşu ilə imtina edəcək.

Bu sözləri Axar.az-a sabiq xarici işlər naziri, politoloq Tofiq Zülfüqarov Fransa Senatından sonra parlamentinin də “dqr”in tanınmasına çağıran qanun layihəsi qəbul etməsi haqda danışarkən deyib.

Onun sözlərinə görə, tövsiyə xarakterli bəyanatlara fikir verməməliyik:

“Fransa Milli Məclisinin “dqr”in tanınmasına çağıran qanun layihəsi tövsiyə xarakterlidir. Şübhəsiz, bu kimi təşəbbüslərlə barışmaq olmaz. Tənqid edib, etirazımızı bildirə bilərik, lakin ciddiyə almaq lazım deyil. Çünki bu, Fransanın daxili siyasi məsələsidir. Hər kəsə bəllidir ki, bu qətnamənin təşəbbüskarı, onu qəbul edən şəxslər kimlərdir. Korrupsiya əsasında ələ alınan fransız “deputat”lardan başqa nə gözləmək olar? Rəsmi Paris bunu ciddi araşdırmalıdır. Ermənistan kimi kiçik bir ölkə öz lobbisi ilə Fransa kimi bir ölkənin deputatlarını ələ ala bilir”.

Politoloq bildirib ki, Makron bu qanunu qəbul etməyəcək:

“Digər tərəfdən, hətta Makronun bunu qəbul edib-etməməsinin bizim üçün əhəmiyyəti yoxdur. Əgər Makron bu qanunu qəbul etsə, bu, onun da Fransa parlamenti kimi korrupsiya bataqlığına batdığını göstərəcək.

Hər kəs bilsin ki, Azərbaycan öz suveren hüquqları, ərazi bütövlüyü çərçivəsində addımlar atacaq və buna heç kəs mane ola bilməz”.