Qanunsuz erməni silahlı bölmələrinin MDB ölkələri liderlərinin sammitində Əliyev və Paşinyanın görüşündən sonra Qarabağ ərazisindən çıxarılacağını gözləməyə dəyməz. Onları Bakı güc yolu ilə öz ərazilərindən yox edəcək.

Bu sözləri Axar.az-a müsahibəsində politoloq, Plexanov adına Rusiya İqtisadiyyat Universitetinin Politologiya və sosiologiya kafedrasının dosenti Aleksandr Perenciyev deyib.

“Bu silahlı qruplaşmalar Paşinyan və onun komandasına yalnız qismən tabe olurlar. Rəsmi İrəvanla yanaşı, onların həm Ermənistanda, həm də Ermənistandan kənarda digər sponsorları var. Bununla yanaşı, bu qanunsuz silahlı birləşmələrin iştirakçıları yalnız erməni millətinin nümayəndələrindən ibarət deyil. Oraya beynəlxalq terrorizmin nümayəndələri - dünya terror şəbəkələrindən olan muzdlular da daxildir.

Ümumilikdə isə ümid var ki, bu görüş Azərbaycan-Ermənistan sərhədində münaqişə hallarının azalmasına kömək edəcək”, - deyə o qeyd edib.

Qeyd edək ki, bu gün MDB dövlət başçılarının Sankt-Peterburqda keçirilən qeyri-rəsmi sammitində Azərbaycan və Ermənistan liderlərinin görüşü gözlənilir.