Bakıda söyüş üstündə törədilmiş qətldə təqsirləndirilən yeniyetmələr - Elmidar Məmmədquliyev və Qismət Nağıyevin cinayət işi üzrə məhkəmə araşdırması yekunlaşıb.

Axar.az xəbər verir ki, Bakı Ağır Cinayətlər Məhkəməsində hakim Leyla Əsgərova-Məmmədovanın sədrliyi ilə baş tutan iclasda hökm elan edilib.

Elnidar Məmmədquliyev və Qismət Nağıyevin hər biri 7 il 9 ay azadliqdan məhrum edilib.

Aparılmış istintaqla müəyyən edilib ki, 2024-cü ilin iyununda yetkinlik yaşına çatmayan Qismət Nağıyev və Elmidar Məmmədquliyev doğum günü münasibətilə "Huqqa" restoranına gediblər. Gecə saatlarında "McDonald's" yaxınlığında tanışları ilə birlikdə olduqları vaxt sərxoş vəziyyətdə olan Nicat Bədəlovla aralarında mübahisə yaranıb.

Mübahisəni aydınlaşdırmaq məqsədilə tərəflər metronun "Əcəmi" stansiyası yaxınlığına gediblər. Orada Elmidar Məmmədquliyev bıçaqla Nicat Bədəlova hücum edərək onu qarın və bud nahiyəsindən yaralayıb. Nicat hadisə yerindən qaçsa da, sonradan xəstəxanada ölüb.

Hadisədən sonra Elmidar Məmmədquliyev və Qismət Nağıyev saxlanılıb. Hər ikisinə qarşı Cinayət Məcəlləsinin 120.2.1, 120.2.2 və 228.4-cü maddələri ilə ittiham irəli sürülüb.