Hazırda Azərbaycanda amnistiya ilə bağlı hazırlıq yoxdur.

Axar.az xəbər verir ki, bunu Report-a açıqlamasında "Konstitusiya" Araşdırmalar Fondunun rəhbəri Əliməmməd Nuriyev deyib.

Onun sözlərinə görə, bununla bağlı müxtəliflər təkliflər səsləndirilib:

"Bu il konstitusiyanın 30 illiyidir, həm də zəfərimizin 5-ci ildönümüdür. Amnistiyanın qəbul edilməsi məqsədəuyğun olardı. Lakin bunun qəbulu Milli Məclisə aiddir. Bu qərarın qəbulu 4-5 il fasilələrlə qəbul olunur. Sonuncu amnistiya 2021-ci ildə qəbul olunub, 4 il keçib artıq. Həbsxanalarda da müəyyən sıxlıqlar var. Amnistiyanın qəbulu üçün zəruri şərtlər də var. Qərarın nə vaxt qəbul edilib-edilməyəcəyi məlum deyil".

Ə.Nuriyev əlavə edib ki, dövlət həmişə ikinci şansını vətəndaşlar üçün yaradır.

Fond rəhbəri qeyd edib ki, Heydər Əliyev tərəfindən 33, Prezident İlham Əliyev tərəfindən 37 əfv sərəncamı imzalanıb, 10 mindən çox məhkuma şamil edilib.

"Sonuncu bu il olub. Hər il əfv sərəncamları imzalanır. Minlərlə insan sevinir. Əfv hüququ Prezident İlham Əliyevin səlahiyyətindədir. Amma Novruz bayramı ərəfəsində və mühüm tarixi proseslərdə sərəncam imzalanır. Hazırda Əfv Komissiyasının Katibliyi fasiləsiz işləyir, müvafiq məlumatlar toplayır".