Hazırda sahibkarlar kommersiya məqsədilə biznes krediti götürdükdə sığortalanır və banklar müvafiq sığorta xidmətlərini təklif edirlər. Lakin istehlak kreditləri üzrə hazırda sığorta tətbiq edilmir.

Bu barədə Axar.az-a açıqlamasında sığorta eksperti Vüsal Bədəlov işsiz qalan vətəndaşın kredit borcunu sığortanın ödəməsi ilə bağlı danışarkən deyib.

Onun sözlərinə görə, yeni qanun qəbul olunsa, istehlak krediti götürən fiziki şəxslər də həyat sığortası ilə əhatə olunacaq:

“Bu da həmin şəxsin gələcəkdə işsiz qalması, əmək qabiliyyətini tam və ya qismən, müvəqqəti itirməsi, eləcə də ölüm halında kredit borcunun sığorta şirkəti tərəfindən ödənməsi ilə bağlıdır. Məsələ aktuallaşarsa, istehlak krediti götürən şəxslər üçün sığortanın icbari, yoxsa könüllü olacağı qanun qəbul edildikdən sonra dəqiqləşəcək. Hətta sığorta könüllü seçim kimi tətbiq olunsa belə, bankların öz daxili qaydalarına əsasən bu növ sığortanı məcburi tələb etməsi mümkündür”.